«Enterprise Armenia» հիմնադրամի և «Invest India» ձեռնարկության միջև փոխգործակցության հուշագրի ստորագրում

01 հուլիսի, 2021

2021 թ. հունիսի 28-ին տեղի է ունեցել «Enterprise Armenia» հիմնադրամի (ՆԱԿ) և «Invest India» (ՆՀ) ձեռնարկության միջև փոխգործակցության հուշագրի ստորագրման արարողությունն՝ առցանց ձևաչափով։

Արարողության ընթացքում բացման խոսքով հանդես եկան Հնդկաստանի Հանրապետությունում Հայաստանի Հանրապետության արտակարգ և լիազոր դեսպան Յուրի Բաբախանյանը և Հայաստանի Հանրապետությունում Հնդկաստանի Հանրապետության դեսպան Կիշան Դան Դեվալը։

Այնուհետև, ողջույնի խոսքով հանդես եկան «Enterprise Armenia»-ի տնօրեն Լևոն Օհանեսյանը և «Invest India» գործադիր տնօրեն Դիպակ Բագլան։

Լ. Օհանեսյանն իր խոսքում կարևորեց երկու պետությունների միջև առևտրատնտեսական կապերի զարգացման և խթանման ջանքերը: Իր հերթին Դ. Բագլան ընդգծեց երկու ազգային կառույցների միջև ինստիտուցիոնալ համագործակցության խորացմանը միտված հուշագրի ստորագրման կարևորությունը: Վերջինս իր խոսքում նաև հիշատակեց, որ դեռևս 2018 թվականի հոկտեմբերին Ժնևում՝ ՄԱԿ-ի Առևտրի և զարգացման կոնֆերանսի (UNCTAD)` երկամյա պարբերականությամբ կազմակերպվող Համաշխարհային ներդրումային համաժողովի (World Investment Forum 2018) Ներդրումների խրախուսման մրցանակաբաշխության արարողության ընթացքում «Invest India» ձեռնարկության մրցանակն իրեն է հանձնել ՀՀ նախագահ Արմեն Սարգսյանը։

Ելույթներին հաջորդեց հուշագրի հանդիսավոր ստորագրումը։ Փոխըմբռնման հուշագրի համաձայն «Enterprise Armenia»-ն և «Invest India»-ն ամրագրել են երկու երկրներում ներդրումային միջավայրը խթանելու գործընթացում փոխադարձ օժանդակություն ցուցաբերելու, փոխադարձաբար երկու երկրների գործարար շրջանակներին աջակցություն տրամադրելու և երկու կողմերի միջև գործարար կապերն ամրապնդելու մտադրությունները: Ըստ վերոհիշյալ հուշագրի՝ երկու կառույցները հաստատում են նաև իրենց մտադրությունները՝ համատեղ ջանքերով նպաստել Հայաստան-Հնդկաստան գործարար ու ներդրումային կապերի զարգացմանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր